კონფიდენციალურობის პოლიტიკა

ბოლო განახლება: 2026-11-05

დისკრეცია ამ პლატფორმის მთავარი პრინციპია. ქვემოთ ზუსტად წერია, რას ვინახავთ, რატომ, ვინ ხედავს და როდის იშლება.

1. რას ვინახავთ

სპეციალისტის მონაცემები

• საჯარო: პროფილის სახელი, ფოტო, ბიო, ქალაქი და უბანი, სერვისები და ფასები, შეფასებები.
• პირადი: ტელეფონი; ზუსტი მისამართი — კლიენტს ჩანს მხოლოდ ადგილზე ვიზიტისას და მხოლოდ გადახდის შემდეგ; IBAN და სერტიფიკატი — მხოლოდ ადმინისტრაციას. სერტიფიკატის ფაილს საჯარო ბმული არ აქვს.

2. რას არ ვინახავთ

• ბარათის მონაცემებს — გადახდა გადახდის პროვაიდერის გვერდზე ხდება; პლატფორმა ბარათის ნომერს ვერ ხედავს.
• კლიენტის სახელსა და გვარს, მისამართს, ქალაქს — ისინი არ არის საჭირო.
• მდებარეობას ტელეფონიდან.

3. რას ხედავს სპეციალისტი

• თქვენს მეტსახელს ან ანონიმურ აღნიშვნას, შეკვეთის კითხვას და ფოტოებს; ბავშვის ჩაწერაზე — ბავშვის მეტსახელს და მიახლოებით ასაკს.
• სავარჯიშოებსა და კითხვარებს — მხოლოდ იმას, რასაც ამ ჩაწერაზე თავად მონიშნავთ. განწყობისა და ძილის დღიურს და აქტივობებს — თქვენ მიერ არჩეული ბოლო დღეებისას.
• გაზიარებას ნებისმიერ დროს წყვეტთ. შეკვეთის დასრულების შემდეგ სპეციალისტი ახალ ჩანაწერებს ვეღარ ხედავს.
• ყოველი ნახვა იწერება — შეკვეთის გვერდზე ხედავთ, როდის ნახა ბოლოს.
• თქვენს ტელეფონის ნომერს სპეციალისტი ვერასდროს ხედავს, ისევე როგორც თქვენ — მისას.

4. რას ხედავს ადმინისტრაცია

შეკვეთებს, გადახდებს და — დავის გახსნისას — შეკვეთის კითხვას, ფოტოებს, პასუხს და საჩივრის ტექსტს. სავარჯიშოები, კითხვარები და ბავშვების პროფილები ადმინისტრაციის პანელში საერთოდ არ არის.

5. ჯანმრთელობის მონაცემი

კითხვა, სავარჯიშოები და კითხვარები შეიძლება ჯანმრთელობის შესახებ ინფორმაციას შეიცავდეს — მათ მგრძნობიარე მონაცემად ვეპყრობით. თავისუფალ ტექსტში ავტომატურად მოწმდება საფრთხის მანიშნებელი სიტყვები — მხოლოდ იმისთვის, რომ გადაუდებელი დახმარების ნომერი გაჩვენოთ. ეს შემოწმება ცალკე არსად იწერება და არავის ეცნობება.

6. შეტყობინებები, ამონაწერი, მოწყობილობა

• SMS-ის ტექსტი ნეიტრალურია — „შეკვეთაზე განახლებაა“, სერვისის, სპეციალისტის ან თემის გარეშე: ის ჩაკეტილ ეკრანზეც ჩანს. დეტალები — მხოლოდ საიტზე, ანგარიშში.
• ბანკის ამონაწერში გადახდა ჩანს როგორც NS DIGITAL.
• შესული ანგარიშის გვერდები ბრაუზერის ქეშში არ რჩება — საერთო მოწყობილობაზე „უკან“ ღილაკი მათ ვეღარ აჩვენებს. მაინც გამოდით ანგარიშიდან.
• თქვენი პროფილი, შეკვეთები და კაბინეტი საძიებო სისტემებისთვის დახურულია. საჯაროა მხოლოდ სპეციალისტების პროფილები და შეფასებები.

7. შენახვის ვადა

• შეკვეთის კითხვა და ფოტოები — შეკვეთის დახურვიდან 90 დღე, შემდეგ ავტომატურად იშლება (თუ დავა არ მიმდინარეობს).
• შეკვეთების და გადახდების ისტორია — კანონმდებლობით დადგენილი ვადით (ბუღალტრული აღრიცხვისთვის).
• სავარჯიშოები, კითხვარები, ბავშვების პროფილები — სანამ თავად არ წაშლით, ან ანგარიშის წაშლამდე.

8. თქვენი უფლებები

ანგარიშის წაშლა თავად შეგიძლიათ — ანგარიშის წაშლის გვერდზე (შესული უნდა იყოთ). მაშინვე იშლება სავარჯიშოები, კითხვარები, ბავშვების პროფილები და შეკვეთებში თქვენი კითხვა, ფოტოები და პასუხი; შეკვეთების თანხა და თარიღი ბუღალტრული მიზნით რჩება ვინაობასთან კავშირის გარეშე, შეფასებები — ანონიმური სახით. ცალკეულ ჩანაწერს ან ბავშვის პროფილს ნებისმიერ დროს თავად შლით. მონაცემების ასლი ან შესწორება — საკონტაქტო გვერდიდან.

9. ქუქიები და ბრაუზერი

• სესიის ქუქი — ანგარიშში შესულად გინახავთ; ანგარიშის გარეშე — გაკვეთილების პროგრესს ამ სესიაში.
• უსაფრთხოების ქუქი (CSRF) — ფორმების გაყალბებისგან დაცვა.
• თემის არჩევანი (ღია/მუქი) — მხოლოდ თქვენს ბრაუზერში ინახება, ჩვენ არ გვეგზავნება.

სარეკლამო ან თვალთვალის ქუქიები და ანალიტიკა არ გვაქვს.

10. მესამე მხარეები

მონაცემები ინახება ევროკავშირის ტერიტორიაზე (ფრანკფურტი) განთავსებულ სერვერებზე. ბარათით გადახდას ამუშავებს გადახდის პროვაიდერი — მას ჩვენ ვუგზავნით მხოლოდ თანხას და შეკვეთის ნეიტრალურ აღწერას. მონაცემებს არავის ვყიდით და არავის გადავცემთ, გარდა კანონით გათვალისწინებული შემთხვევებისა.